文學的「四句聯仔」 |
台灣自從早期被荷蘭人佔領後,福建、廣東沿海的唐山客,以為「台灣錢淹跤(腳)目,就陸續渡過烏水溝來台扑拚趁食。因當初時遮個(這些)移民,清一色攏是「羅漢跤」,卜(要)踮台灣娶某,毋是赫(hiah4)爾簡單的代誌,所以逐擺若拄著結婚喜慶的時,攏有一大陣親情(戚)朋好前來賀喜祝福,唸四句聯仔來鬥鬧熱。 四句聯仔內容有時無古體詩的含蓄,但是四句聯的內容往往佮生活相結合,表現了「心適」、「祝福」、「感謝」、「吉利」甚至「創治」等的特色、尤其是以四句為範圍、每一句字數閣平濟,若像一首七絕仔、五絕仔、四言古詩的詩作,另外閣是「全鬥句(押韻)」的音樂性,所以嘛若像一首歌,聽起來入耳,予人歡喜。四句聯佇喜慶等鬧熱場所,大聲唸出來,若像珍珠串連,一方面表現講者的口才佮變巧 ,一方面講吉利好聽話,予聽的人感覺心適煞拍,舖排著鬧熱的氣氛,表現了人佮人之間的和諧、友誼。有一句俗語講「講話若像唱歌」,這是指台灣話的音樂性來講,特別是「鬥句」的特色,假那「天籟」一般。 「四句聯仔」表達的時機是,過年過節、喜慶宴會的時,比如:入厝、訂婚、迎親、食喜酒、食新娘茶、嬰仔度晬、男女相褒、工課歇困、茶山挽茶等,表達著心適、祝福、祈求、感謝等心情佮氣氛的製造。四句聯仔表達方式主要是用四句做一個單位來表達,全鬥句(押韻),每一句的字數以七字卡普遍,所以往往有「七字仔」的講法。當然嘛有五字一句,抑是四字一句的表達方式。舉例如下: 七字一句: 新郎車門扑開開,金銀財寶歸大堆。新娘囝婿行出來,生囝生孫中秀才。 五字一句: 四字一句 茶盤圓圓,甜茶甜甜,情話綿綿,冬尾雙生。 其他方式: 新娘聊聊仔行,明年緊做阿娘。 新娘行入厝,家財年年富。 食圓,富貴萬萬年。食芋,食著好頭路。
各種四句聯的舉例:
‧祝賀新禧四句聯 古吹八音鬧呵呵,祝福新年景氣好。男女老幼滿街趖,消遙自在樂陶陶。 炮聲連響響連天,土農工商過新年。恭祝家家大發展,男女老幼齊康健。
‧食茶、喜酒四句聯 茶杯深深深,予恁翁某會仝心。茶杯捧正正,予恁會得眾人疼。 逐家愛用菜,新娘嫁著好翁婿。逐家愛飲酒,新郎娶著好牽手。
‧褒歌四句聯 李仔卜食粒粒酸,枋橋對面是新莊,娘仔生做跡幼軟,喙邊來唚卡甜糖。 山頂一片茶葉青,茶花滿開笑微微。挽茶阿娘真古錐,人看人愛人合意。
‧民謠四句聯 一更更鼓月照山,牽君的手摸心肝,阿君問娘卜按怎,隨在阿君的心肝。 四更更鼓月照門,牽君的手入繡床,雙人相好月所向,卡好滾水泡冰糖。
‧民間歌仔簿四句聯─周成過台灣(摘錄) 周成在厝真有孝,別妻父目屎流 台灣初次才來到 伊對淡水起錠頭 父囝對坐咧相議 人講台灣好時機 恨咱家貧斷寸鐵 賢妻有身卜到時
收話尾: 每一種的語言攏有伊家治(己)的個性,即款的個性往往包含腔口、聲調佮內容表達的方式,所以語言學家時常強調,語言毋(m7)是干礁一種溝通的工具爾爾(nia7),伊閣是一種思考的方式、感情的交流、文化的表現、族群的符號,這毋是別種語言有法度來取代的。「台語」具備了真濟(ce7)語言的特性。尤其是伊的「音樂性」─八聲調,所以往往一聽終生難忘,特別是流傳佇民間的歌仔冊、歌謠、褒歌、說唱唸謠、食茶講好話等以四句押韻(鬥句)的方式來表達的形式─「四句聯仔」,為一般人所喜愛,成做台灣「口頭文學」的特色。 台灣話的四句聯仔,會使講是台灣民間文學上重要的文化遺產,咱逶(ui2)即款的表現方式,看出台灣人的樂觀、笑詼、心適的民族性格,佮語言的特性,充份表現出即塊土地的聲嗽,母語的奶芳,向望逐家攏來重視學習研究,共伊化做台灣文學的肥底。 |
留言列表